ദലീമ

  

ഒരേ ഛായയുള്ളവർ ലോകത്തിൽ ഏറെ പേരുണ്ടാവും . ചെറിയ ചെറിയ വ്യത്യാസങ്ങളിൽ തമ്മിൽ തെറ്റിപ്പോവുന്നവർ .  പെരുമാറ്റത്തിൽ ഒരേപോലെ ഉള്ളവർ ... അങ്ങിനെയും  അപൂർവം പേരുണ്ടാവും. ഒരേ ശബ്ദം ... കണ്ണടച്ച്  ശ്രദ്ധിച്ചാൽ പോലും  തിരിച്ചറിയാൻ പറ്റാത്ത സാമ്യം ഉള്ളവർ . അങ്ങിനെ  സാമ്യം തോന്നുന്ന തരത്തിൽ  കാഴ്ചയിലും, പെരുമാറ്റത്തിലും , ശബ്ദത്തിലും എല്ലാം ഓരോരോ ഇടങ്ങളിൽ മനുഷ്യരെത്രയോ ഉണ്ട്.  

പ്രശസ്തരായവരുമായി സാമ്യം തോന്നുന്നത് അത്യപൂർവമായി അനുഭവപ്പെടുന്നത്. അത്തരം ഒരു സാമ്യത  ഒന്ന് തേടിപോവാം....

 

എസ്  ജാനകി . ശബ്ദ മാധുര്യത്തിന്റെ ഉന്നതങ്ങളിലെ നില തുടരുന്ന ഈ ദക്ഷിണേന്ത്യൻ  ഗായികയോട് ശബ്ദത്തിൽ സാമ്യം തോന്നുന്ന ഒരു ഗായിക നമുക്ക് മലയാളത്തിൽ ഉണ്ട്.  ആലപ്പുഴക്കാരിയായ  ദലീമ എന്ന ഗായികയെ കുറിച്ചാണ് സൂചിപ്പിച്ചത്. ശബ്ദത്തിൽ എസ് ജാനകിയോടു ഏറെ സാമ്യം തോന്നിപ്പിക്കുന്നത് . മലയാള സിനിമയിൽ ഏറെയൊന്നും പാടാൻ ഇവർക്കവസരം ലഭിച്ചിട്ടില്ല .  അത്രയും മധുര ശബ്ദമായിട്ടും എന്തോ വളരെ കുറച്ചു മലയാള ചലച്ചിത്രത്തിലെ  പാടാൻ കഴിഞ്ഞുള്ളു. അതും ശ്രദ്ധിക്കപ്പെട്ടത് വിരലിൽ എണ്ണാവുന്നതും...  അതൊരിക്കലും അവരുടെ കഴിവിന്റെ കുറവായി തോന്നില്ല. കാരണം എടുത്തു പറയാവുന്ന പാട്ടുകളുടെ മനോഹാരിത അത് കേട്ടാലേ മനസ്സിലാവൂ...

മഞ്ഞുമാസപ്പക്ഷീ മണിത്തൂവൽ കൂടുണ്ടോ ( കൃഷ്ണഗുഡിയിൽ ഒരു പ്രണയകാലത്ത് ) 

ഗിരീഷ് പുത്തഞ്ചേരിയുടെ രചനയ്ക്ക്  വിദ്യാസാഗറിന്റെ സംഗീതം... നല്ലൊരു തുടക്കം കിട്ടിയിട്ടും ശ്രദ്ധിക്കപ്പെട്ടില്ല.

ഈ തെന്നലും  തിങ്കളും പൂക്കളും ( നീ വരുവോളം ) 

ഗിരീഷ് പുത്തഞ്ചേരി രചന ജോൺസൻ സംഗീതം. 

കല്യാണപിറ്റേന്നിൽ തുടങ്ങി  ശ്രീകൃഷ്ണപുരത്തെ നക്ഷത്ര തിളക്കം ,ഗ്രാമപഞ്ചായത്ത് , ഇഗ്ളീഷ് മീഡിയം ഇവയിലൂടെയൊക്കെ കടന്നു പോവാൻ പറ്റിയെങ്കിലും ചൊവ്വുള്ള ഗാനങ്ങളൊന്നും ആയിരുന്നില്ല അവയൊന്നും..

ആ ശബ്ദ മാധുര്യം സിനിമാ ഗാനങ്ങളിലൂടെ  കേൾക്കാൻ ആയില്ലെങ്കിലും കൈ നിറയെ ഭക്തി ഗാനങ്ങൾ ഉണ്ട് ദലീമക്ക് . ക്രിസ്ത്യൻ , ഹിന്ദു ഭക്തി ഗാനങ്ങളിലൂടെ ദലീമ തിളങ്ങി നിൽക്കുന്നുമുണ്ട് . 

ഇന്നിപ്പോൾ കേരളത്തിന്റെ ഒരു നിയോജകമണ്ഡലത്തെ പ്രതിനിധീകരിക്കുന്ന എം എൽ എ കൂടിയാണ് ദലീമ . സീ പി ഐ എമ്മിനെ പ്രധിനിധീകരിച്ചു കൊണ്ട് അരൂർ നിയോജക മണ്ഡലത്തിൽ നിന്നും ജയിച്ചു കയറിയിരിക്കയാണ്.... 

സിനിമയിൽ പരാജയപ്പെട്ടെങ്കിലും സമൂഹത്തിനു വേണ്ടി ഒരു എമ്മെല്ലേ എന്ന നിലയിൽ ദലീമയ്ക്ക് പലതും ചെയ്യാൻ കഴിയും.. അതിനുള്ള എല്ലാ അവസരങ്ങളും അവർക്കു കിട്ടട്ടെ എന്നാശംസിച്ചു കൊളളുന്നു...